தொட்டு விடும் தூரம்தான்
தொடச் சொல்லும் தொடுவானம்
தொடச் சென்றால் நகர்ந்துவிடும்
தொலைதூரம் தொடுவானம்
கிட்டக் கிட்ட இருப்பது போல்
கானலெனக் கண்காட்டி
எட்ட எட்ட நகர்ந்துவிடும்
எட்டாத தொடுவானம்
அன்னை கொண்ட அன்பும்
அளந்தறியாத் தொடுவானம்
கல்வி என்னும் அறிவும் என்றும்
கற்று முடியாத் தொடுவானம்
முத்து முத்தாய்ச் சொல் கோர்த்த
மொழியும் ஒரு தொடுவானம்
முழுதுணர்ந்த ஞானம் என்பார்
முற்றும் அது தொடுவானம்
தேன்தேடி பூதாவும்
தட்டாம்பூச்சி தொடுவானம்
நான்தேடும் கவிகூட
பலநேரம் தொடுவானம்
